2025 жылғы 7 қарашада Орыс филологиясы кафедрасында филология ғылымдарының докторы, профессор Людмила Васильевна Сафронованың «Психоаналитикалық және когнитивтік әдебиеттану: данышпандық табиғаты» тақырыбындағы онлайн қонақ дәрісі өтті.
Дәріс студенттер мен оқытушылар үшін маңызды зияткерлік оқиғаға айналды. Людмила Васильевна психоаналитикалық және когнитивтік тәсілдердің негізгі қағидаларын терең әрі нанымды түрде ашып көрсетті, олардың көркем мәтінді талдаудағы эвристикалық әлеуетін таныстырды, сондай-ақ данышпандық табиғаты мәселесін пәнаралық тұрғыдан қарастырды.
Студенттер заманауи ғылыми тұжырымдамалармен танысуға, осындай деңгейдегі маманға сұрақтар қоюға және өздерінің академиялық ой-өрісін кеңейтуге мүмкіндік алды. Дәріс жоғары ғылыми мәдениетімен, дәлелділігімен және мазмұнды әрі шабыттандыратын баяндау мәнерімен ерекшеленді.
Қонақ дәрістің модераторы педагогика ғылымдарының магистрі Қайрлиева Нұргүл Балқашқызы болды. Дәріске кафедраның профессор-оқытушылар құрамы, магистранттар мен студенттер қатысты. Филология ғылымдарының кандидаты, профессор Ж.Е. Кенжебаева және 4-курс студенттері дәріскерге өз сұрақтарын қойып, ізгі тілектерін білдірді.
Орыс филологиясы кафедрасы Людмила Васильевнаға шығармашылық шабыт, толағай табыстар және жаңа ғылыми жетістіктер тілейді.
