Абузьярова Жанна Рафиковна

Экономика ғылымдарының магистрі, аға оқытушы, жоғары білім беру саласында көп жылдық тәжірибесі бар білікті педагог және зерттеуші. Ол 1997 жылы Халел Досмұхамедов атындағы Атырау мемлекеттік университетін «Экономика және менеджмент» мамандығы бойынша тәмамдаған. Кейін 2005 жылы осы университетте «Құқықтану» мамандығы бойынша екінші жоғары білім алған. 2012 жылы М. Өтемісов атындағы Батыс Қазақстан мемлекеттік университетінде «Экономика» мамандығы бойынша магистрлік дәрежесін иеленді. Еңбек жолын 2001 жылы Х. Досмұхамедов атындағы Атырау университетінің «Менеджмент» кафедрасында оқытушы ретінде бастап, бүгінгі күнге дейін осы оқу орнында аға оқытушы қызметін атқарып келеді. Жанна Рафиковнаның ғылыми қызығушылықтары персоналды басқару мәселелеріне бағытталған. Ол осы бағытта бірқатар ғылыми еңбектер жариялап, отандық және шетелдік ғылыми басылымдарда зерттеулерін ұсынған. Оның еңбектері Польша, Украина сияқты елдердің ғылыми журналдарында, соның ішінде Scopus базасына енгізілген басылымдарда жарық көрген. Ғалымның негізгі зерттеу тақырыптары – персоналды басқару жүйесін жетілдіру, еңбек мотивациясы, мемлекеттік қызметкерлерді ынталандыру, адам капиталының дамуы, сондай-ақ кәсіпорындардың цифрлық трансформациясы мен тұрақты даму мәселелері. Абузьярова Жанна Рафиковна оқу-әдістемелік жұмыстарға да белсенді қатысады. Ол «Менеджмент» (2023), «Корпоративтік медиа-коммуникацияларды басқару» (2024) және «Экономикалық ілімдердің тарихы» (2025) атты оқу құралдарының авторы және тең авторы болып табылады. Біліктілігін арттыру мақсатында әл-Фараби атындағы Қазақ ұлттық университетінде, National Alumni Network, QazTrade Academy, Coursera платформасында, сондай-ақ Еуразия ұлттық университеті мен басқа да халықаралық және отандық ұйымдарда түрлі курстар мен тағылымдамалардан өткен. Соның ішінде экономика пәндерін оқыту әдістемесі, халықаралық сауда, жобаларды басқару, инклюзивті білім беру, жасанды интеллект және нейрондық желілер бағыттары бойынша сертификаттарға ие. Педагогикалық қызметінде бакалавриат деңгейінде «Экономикалық теория», «Микро- және макроэкономика», «Академиялық хат», «Инновациялық менеджмент» пәндерін, сондай-ақ «HR-менеджмент», «Мемлекеттік басқару теориясы», «Корпоративтік медиа-коммуникацияларды басқару», «Мемлекеттік басқаруда шешім қабылдау» және «Экономикалық ілімдер тарихы» сияқты пәндерді оқытады. Еңбегі жоғары бағаланып, 2016 жылы «Нұр Отан» партиясының алғысымен, 2022 жылы облыстық мәслихаттың алғыс хатымен, 2024 жылы Қазақстан Республикасы Ғылым және жоғары білім министрлігінің алғысымен марапатталған. Сонымен қатар оның жетекшілігімен студенттер халықаралық ғылыми байқауларда жүлделі орындарға ие болып келеді.