Махметова Эльмира Махметқызы

Махметова Эльмира Махметқызы — Х.Досмұхамедов атындағы Атырау университетінің «Бейнелеу өнері және дизайн» кафедрасының аға оқытушысы, Еуразия дизайнерлер одағы мен Қазақстан этнодизайнерлер одағының мүшесі. 1984 жылы 2 тамызда дүниеге келген. 2001–2006 жылдары Х.Досмұхамедов атындағы Атырау мемлекеттік университетінің Педагогика, психология және өнер факультетінде білім алып, «Интерьер дизайнері» мамандығын меңгерді. Еңбек жолын 2005 жылы дизайн саласында бастады. Әр жылдары «АДАМ» жарнама агенттігінде дизайнер, «JARDINI» дизайн студиясында жарнама және интерьер дизайнері, «ДИАР» компаниясында жарнама және жиһаз дизайнері, «Эталон» жарнама агенттігінде жарнама дизайнері, сондай-ақ «SATIN» тігін шеберханасында бас дизайнер қызметтерін атқарды. Осылайша, жарнама, интерьер, жиһаз және киім дизайны бағыттарында мол тәжірибе жинақтады. 2022 жылдан бастап Х.Досмұхамедов атындағы Атырау университетінің «Бейнелеу өнері және дизайн» кафедрасында аға оқытушы қызметін атқарып келеді. Педагогикалық қызметінде дизайн, көркем білім беру, этнодизайн және шығармашылық жобалау бағыттарына ерекше назар аударады. Кәсіби біліктілігін жүйелі түрде жетілдіріп келеді. 2023 жылы халықаралық «Орхун» бағдарламасы аясында Түркияның Бурса қаласындағы Улудаг университетінде ғылыми тағылымдамадан өтті. Сонымен қатар Ақдениз университетінде текстиль дизайны мен өнері, базалық үлгілерді талдау және құрастыру бойынша семинарларға қатысты. Сербиядағы инклюзивті білім беру, Финляндиядағы педагогикалық білім беру моделі, Атыраудағы көркем білім беру мен дизайндағы заманауи мәселелер, академиялық жазылым, кәсіби қызмет сапасын арттыру бойынша курстардан өткен. Сондай-ақ «Сарайшық – бабалар мұрасы» жобасы аясында мүсін және кескіндеме бағытындағы шеберлік сабақтарына қатысқан. Ғылыми-зерттеу және жобалық қызметінде этнодизайн мен қолөнер мұрасын жаңғыртуға басымдық береді. «Заманауи этнодизайн негізінде ортағасырлық Сарайшық қаласының қолөнер бұйымдарын қайта жаңғырту» атты жобаға қатысады. Сонымен қатар «Күміс университеті» бағдарламасы аясында 2024 жылы «Тігін үйрену жолдары» тақырыбында курс өткізіп, практикалық бағыттағы білім беруге үлес қосты. Кәсіби және шығармашылық қызметі бірқатар марапаттармен аталып өтті. Атап айтқанда, 2016 жылы Мәскеуде өткен «Жарнама негіздері және материалдары» көрмесіне қатысқаны үшін Алғыс хат алды, 2023 жылғы «Музей түні» мәдени жобасына қатысқаны үшін марапатталды. 2024 жылы «Сарайшық – бабалар мұрасы» жобасына қолдау көрсеткені үшін Алғыс хатпен, сондай-ақ Атырау облысы білім және ғылым қызметкерлері кәсіподағы тарапынан білім беру саласын дамытуға қосқан үлесі үшін Құрмет грамотасымен марапатталды.