Қарабалин Оразбай Төлегенұлы

Қарабалин Оразбай Төлегенұлы — Х.Досмұхамедов атындағы Атырау университетінің «Бейнелеу өнері және дизайн» кафедрасының сеньор-лекторы, өнертану ғылымдарының магистрі, Еуразия дизайнерлер одағының мүшесі. 1974 жылы 2 қазанда дүниеге келген. 1994–1998 жылдары Х.Досмұхамедов атындағы Атырау мемлекеттік университетінде «Бейнелеу өнері және сызу» мамандығы бойынша білім алып, бейнелеу өнері және сызу пәнінің мұғалімі біліктілігін иеленді. 2017–2019 жылдары Л.Н.Гумилев атындағы Еуразия ұлттық университетінде «Дизайн» мамандығы бойынша магистратураны тәмамдап, өнертану ғылымдарының магистрі дәрежесін алды. Еңбек жолын 1998 жылы аталған университеттің «Бейнелеу өнері және сызу» кафедрасында оқытушы қызметінен бастады. Кейін 2005 жылдан бастап «Бейнелеу өнері және дизайн» кафедрасында аға оқытушы, қазіргі таңда сеньор-лектор ретінде еңбек етіп келеді. Ғылыми-педагогикалық қызметінде көркем білім беру, дизайн, ұлттық жиһаз өнері, кеңістік ортасын ұйымдастыру, композициялық ойлау және студенттердің шығармашылық қабілетін дамыту мәселелеріне ерекше көңіл бөледі. Студенттердің ғылыми жобаларына жетекшілік етіп, мектеп мұғалімдеріне ғылыми-әдістемелік кеңесші ретінде қолдау көрсетеді. Кәсіби біліктілігін жүйелі түрде жетілдіріп келеді. Қазақстан Республикасы Білім және ғылым министрлігінің «Өрлеу» ұлттық орталығы, Т.Жүргенов атындағы Қазақ ұлттық өнер академиясы, Түркиядағы Ақдениз университеті, Финляндиядағы HAMK қолданбалы ғылымдар университеті және басқа да халықаралық білім беру ұйымдары ұйымдастырған курстар мен бағдарламаларға қатысқан. Сонымен қатар, академиялық сурет, кескіндеме, графикалық дизайн, цифрлық бағдарламалар (Adobe Photoshop, SketchUp), текстиль және дизайн өнері, педагогикалық модельдер мен ғылыми жазылым бағыттары бойынша біліктілігін арттырған. «Сарайшық – бабалар мұрасы» жобасы аясында мүсін және кескіндеме шеберлік сабақтарына қатысқан. Қарабалин О.Т.-ның ғылыми еңбектері отандық және халықаралық басылымдарда жарық көрген. Оның зерттеулері дизайндағы кеңістік ортасын ұйымдастыру, ұлттық жиһаз композициясы, көркем білім беру педагогикасы, этнодизайн және цифрлық технологиялардың білім берудегі рөлі сияқты бағыттарды қамтиды. Ғылыми мақалалары халықаралық конференциялар жинақтарында және Scopus базасына енген World Journal on Educational Technology журналында жарияланған. Ғалым халықаралық симпозиумдар мен көрмелерге белсенді қатысады. Атап айтқанда, Қазақстан, Түркия, Моңғолия және басқа елдерде өткен халықаралық суретшілер симпозиумдары мен көрмелерде өз шығармашылығын таныстырған. Сондай-ақ халықаралық ғылыми ынтымақтастық аясында Қырғызстан-Түрік Манас университетімен меморандумға қатысқан. Кәсіби және шығармашылық жетістіктері үшін бірқатар марапаттарға ие. Олардың қатарында ЮНЕСКО аясында өткен Махамбет Өтемісұлының 200 жылдығына арналған байқауда I дәрежелі диплом, Еуразия дизайнерлер одағының «Дизайн саласындағы жетістіктер үшін» медалі (2020), «Нұр Отан» партиясының Алғыс хаты (2021), сондай-ақ «Сарайшық – бабалар мұрасы» жобасына қосқан үлесі үшін берілген Алғыс хат (2024) бар.