Төлеуов Дидар Амандықұлы

Төлеуов Дидар Амандықұлы — Х.Досмұхамедов атындағы Атырау университетінің «Бейнелеу өнері және дизайн» кафедрасының сеньор-лекторы, техника ғылымдарының магистрі, Еуразия дизайнерлер одағының мүшесі. 1967 жылы 2 тамызда дүниеге келген. 1988–1993 жылдары Абай атындағы Алматы мемлекеттік университетінің көркемсурет-графика факультетінде білім алып, бейнелеу өнері, сызу және еңбек пәндерінің оқытушысы біліктілігін иеленді. Кейін 2016–2018 жылдары Қазақстан инновациялық және телекоммуникациялық жүйелер университетінде «Ақпараттық жүйелер» мамандығы бойынша магистратураны тәмамдап, техника ғылымдарының магистрі дәрежесін алды. Еңбек жолын 1994 жылы Х.Досмұхамедов атындағы Атырау университетінде бастап, «Бейнелеу өнері және сызу» кафедрасында оқытушы қызметін атқарды. Кейін «Бейнелеу өнері және дизайн» кафедрасында аға оқытушы, қазіргі таңда сеньор-лектор ретінде еңбек етіп келеді. Көпжылдық педагогикалық тәжірибесі барысында көркем білім беру, дизайн және цифрлық технологияларды ұштастыру бағытында кәсіби қызметін жалғастырып келеді. Кәсіби біліктілігін жүйелі түрде жетілдіріп отырады. Әр жылдары «Өрлеу» ұлттық біліктілікті арттыру орталығы, «Назарбаев Зияткерлік мектептері» педагогикалық шеберлік орталығы, Т.Қ. Жүргенов атындағы Қазақ ұлттық өнер академиясы, Ақдениз университеті, Хяме қолданбалы ғылымдар университеті және Х.Досмұхамедов атындағы Атырау университеті базасында өткен курстар мен бағдарламаларға қатысты. Оның кәсіби даму бағыттары қатарында жаңартылған білім беру мазмұны, графикалық дизайн, Adobe Photoshop және SketchUp бағдарламалары, инклюзивті білім беру, көркем білім беру мен дизайндағы заманауи мәселелер, педагогикалық білім моделін енгізу, кәсіби қызмет сапасын арттыру бар. Сонымен қатар «Сарайшық – бабалар мұрасы» жобасы аясында мүсін және кескіндеме шеберлік сыныптарына қатысқан. Ғылыми-әдістемелік және тәлімгерлік қызметінде студенттердің ғылыми жобаларына жетекшілік жасап, мектеп мұғалімдеріне сыртқы ғылыми кеңесші ретінде қолдау көрсетеді. Оның кәсіби қызығушылықтары көркем білім беру, дизайн, графикалық бағдарламаларды қолдану және шығармашылық әлеуетті дамыту мәселелерімен байланысты. Дидар Амандықұлы халықаралық көрмелерге, симпозиумдарға және онлайн шығармашылық жобаларға белсенді қатысады. 2020 жылы Х.Досмұхамедов атындағы Атырау университетінің 70 жылдығына арналған халықаралық онлайн көрмеге қатысты. 2021 жылы Түркия Республикасының Анталия қаласында өткен «4-ші Халықаралық Жерорта теңізі бейнелеу өнері симпозиумы» аясындағы топтық онлайн көрмеге қатысып, кәсіби тәжірибесін халықаралық деңгейде танытты. Көпжылдық шығармашылық және педагогикалық еңбегі үшін бірқатар марапаттарға ие болды. 2016 жылы Еуразия дизайнерлер одағының «За творческие отличие в дизайнерском искусстве» медалімен және Қазақстан Республикасы Тәуелсіздігінің 25 жылдығына арналған ІІІ халықаралық көрменің ІІ дәрежелі дипломымен марапатталды. Сондай-ақ Атырау облыстық Ш. Сариев атындағы көркемсурет және қолданбалы-сәндік өнер музейі ұйымдастырған «Патриотизм – ұлттық рух» атты облыстық байқау-көрмеде ІІІ дәрежелі диплом иеленді. 2023 жылы облыс әкімінің Алғыс хатын алды. 2024 жылы Қазақстан Республикасы Ғылым және жоғары білім министрлігінің Алғыс хатымен марапатталса, 2025 жылы университеттің 85 жылдық мерейтойы аясында «Университет дамуына сіңірген еңбегі үшін» белгісіне ие болды.