Утаралиев Айса Бахтиярұлы

Утаралиев Айса Бахтиярұлы — Х.Досмұхамедов атындағы Атырау университетінің «Бейнелеу өнері және дизайн» кафедрасының аға оқытушысы, Қазақстан суретшілер одағының мүшесі. 1956 жылы 23 маусымда дүниеге келген. 1975–1979 жылдары Н.В. Гоголь атындағы Алматы көркем-сурет училищесінде білім алып, кәсіби көркемдік даярлықтан өтті. 1981–1986 жылдары Абай атындағы Қазақ педагогикалық институтында білімін жалғастырып, көркем білім беру саласында жоғары біліктілікке ие болды. Еңбек жолын 1979 жылы бастап, 1979–1988 жылдары өндірістік салада (МесПром) технолог қызметін атқарды. 1988–2005 жылдары Қазақстан суретшілер одағы жүйесінде шығармашылық қызметпен айналысып, кәсіби суретші ретінде қалыптасты. 2005 жылдан бастап Х.Досмұхамедов атындағы Атырау университетінде қызмет етіп келеді. Университет қабырғасында «Бейнелеу өнері және дизайн» кафедрасында оқытушы, қазіргі таңда аға оқытушы ретінде еңбек етуде. Көпжылдық шығармашылық және педагогикалық қызметі барысында көркем өнер, бейнелеу мәдениеті және кәсіби суретшілік тәжірибені білім беру үдерісімен ұштастырып, студенттердің шығармашылық әлеуетін дамытуға үлес қосып келеді. Кәсіби жетістіктері мен мәдениет саласына қосқан үлесі жоғары бағаланған. 2014 жылы «Қазақстан Республикасының мәдениет саласының үздігі» төсбелгісімен марапатталды. 2018 жылы бейнелеу өнері саласындағы ерекше еңбегі үшін Ә.Қастеев атындағы алтын медальдің иегері атанды.