Атырау университеті мен Білім басқармасының Әдістемелік орталығы білім беру сапасын арттыру мақсатында ынтымақтастық орнатады

Х.Досмұхамедов атындағы Атырау университеті мен Атырау облысы Білім басқармасының Әдістемелік орталығы арасында маңызды кездесу өтті.

Жиналыстың басты мақсаты – өңірдегі білім беру сапасын арттыру, педагогикалық білімді дамыту, жаңа әдістемелерді енгізу және бірлескен ғылыми-зерттеу жұмыстарын талқылау болды.

Кездесу барысында екі ұйымның өкілдері білім беру жүйесіндегі заманауи өзгерістер, инновациялық педагогикалық әдістер, кадрларды даярлау және қайта даярлау мәселелерін жан-жақты қарастырды. Университет пен әдістемелік орталық арасында білім беру саласындағы үздік тәжірибелерді енгізу және болашақ мамандарды даярлау бағытында жүйелі жұмыстар жүргізу туралы келісім жасалды.

Негізгі талқыланған тақырыптар:

• Оқу үдерісіне жаңа әдістемелерді енгізу және оларды жетілдіру

• Педагогикалық білім беру бағдарламаларын дамыту

• Студенттер мен оқытушыларға арналған біліктілікті арттыру курстары

• Бірлескен ғылыми-зерттеу жобаларын іске асыру

• Цифрлық білім беру технологияларын қолдану және жетілдіру

Кездесу нәтижесінде тараптар ұзақ мерзімді ынтымақтастықты нығайту, педагогикалық кадрларды даярлау жүйесін жетілдіру және өзара тәжірибе алмасу туралы келісімге келді. Бұл бастама еліміздің білім беру сапасын жақсартуға және болашақ мамандардың кәсіби деңгейін көтеруге зор үлес қосады.