Насипуллаев Еркебұлан Бекбергенұлы

Насипуллаев Еркебұлан Бекбергенұлы — Х.Досмұхамедов атындағы Атырау университетінің «Бейнелеу өнері және дизайн» кафедрасының сеньор-лекторы, өнертану ғылымдарының магистрі, Еуразия дизайнерлер одағының мүшесі. 1993 жылы 20 ақпанда дүниеге келген. Алғашқы кәсіби білімін 2008–2012 жылдары Каспий өңірінің қазіргі замандағы колледжінің техникалық факультетінде алып, есептеу техникасы және бағдарламалық жасақтама мамандығын меңгерді. Кейін 2014–2017 жылдары Х.Досмұхамедов атындағы Атырау мемлекеттік университетінің физика, математика және информатика факультетінде «Информатика» мамандығы бойынша бакалавр дәрежесін алды. 2017–2019 жылдары Л.Н.Гумилев атындағы Еуразия ұлттық университетінің Сәулет және құрылыс факультеті, «Дизайн және инженерлік графика» кафедрасында білім алып, өнертану ғылымының магистрі дәрежесін иеленді. 2019 жылдан бастап Х.Досмұхамедов атындағы Атырау университетінің Гуманитарлық ғылымдар және өнер факультетінде қызмет атқарып келеді. Кафедрадағы оқу-әдістемелік және ғылыми жұмысында дизайн, инженерлік графика, көркем білім беру және цифрлық технологияларды ұштастыра отырып еңбек етеді. Кәсіби біліктілігін тұрақты түрде жетілдіріп келеді. Әр жылдары «Өрлеу» ұлттық біліктілікті арттыру орталығында, графикалық дизайн және Adobe Photoshop, SketchUp бағдарламалары бойынша курстарда білімін жетілдірді. Сонымен қатар Түркиядағы Кастамону университетінде, Қырғызстан-Түркия Манас университетінде және халықаралық «Орхун» бағдарламасы аясында Түркияның Бурса қаласындағы Улудаг университетінде ғылыми тағылымдамалардан өтті. Ақдениз университетінде графикалық дизайндағы макет жасауға арналған физикалық материалдар бойынша халықаралық семинарға қатысып, Финляндиядағы Хяме қолданбалы ғылымдар университетінде педагогикалық білім моделін енгізу мен мазмұнын нығайту бағдарламасы бойынша оқыды. Сондай-ақ көркем білім беру мен дизайндағы заманауи мәселелер, кәсіби қызмет сапасын арттыру, мүсін және кескіндеме шеберлік сыныптары сияқты бағыттар бойынша біліктілігін арттырды. Ғылыми-зерттеу қызметінде этнодизайн, сәулеттік орта, жағалау кеңістіктерінің көркемдік ұйымдастырылуы, бионикалық стиль және құрылыс материалдарын заманауи қолдану мәселелеріне назар аударады. Ол «Заманауи этнодизайн негізінде ортағасырлық Сарайшық қаласының қолөнер бұйымдарын қайта жаңғырту» атты ғылыми жобаға қатысады. Ғылыми еңбектері отандық және халықаралық басылымдарда жарияланған. Оның зерттеулері бионикалық стильдің дизайн мен қоршаған ортаға оң әсері, жағалау аймақтарын сәулеттік ұйымдастыру тәжірибесі, ұлттық білім жүйесінің жаңаруы, аэрогель мен графен негізіндегі құрылыс материалдарын қолдану, жағажай дизайнын қалыптастыру әдістері сияқты өзекті мәселелерді қамтиды. Ғылыми мақалалары Самара, Астана, Нұр-Сұлтан, Жапония және басқа ғылыми алаңдарда өткен халықаралық конференциялар материалдарында жарық көрген. Еркебұлан Бекбергенұлы студенттердің ғылыми жобаларына жетекшілік жасап, олардың зерттеушілік және шығармашылық әлеуетін дамытуға үлес қосады. Сонымен қатар халықаралық көрмелерге, симпозиумдарға және өнер лагерлеріне белсенді қатысады. Оның кәсіби белсенділігі Түркиядағы халықаралық өнер лагерьлері, панорама көрмелері мен Жерорта теңізі аймағындағы көркемөнер симпозиумдары арқылы кеңінен танылған. Кәсіби және ғылыми қызметі үшін бірқатар марапаттарға ие. 2023 жылы «Наурыз-көктем» шығармашылық көрмесін ұйымдастыруға атсалысқаны үшін және «Жастар және ғылым: бүгіні мен болашағы» халықаралық ғылыми-тәжірибелік конференциясына қатысқаны үшін сертификаттармен марапатталды. 2024 жылы Ахмет Байтұрсынұлы төсбелгісіне ие болып, «Сарайшық – бабалар мұрасы» жобасын ұйымдастыруға қолдау көрсеткені үшін Алғыс хатпен марапатталды.