Шәріп Еркебұлан Жұмаденұлы

Шәріп Еркебұлан Жұмаденұлы — Х.Досмұхамедов атындағы Атырау университетінің «Бейнелеу өнері және дизайн» кафедрасының сеньор-лекторы, педагогика ғылымдарының магистрі. 1982 жылы 28 қаңтарда дүниеге келген. 1999–2003 жылдары Х.Досмұхамедов атындағы Атырау мемлекеттік университетінде «Бейнелеу өнері және сызу» мамандығы бойынша білім алып, жоғары кәсіби біліктілікке ие болды. 2014–2016 жылдары Абай атындағы Қазақ ұлттық педагогикалық университетінде магистратураны тәмамдап, «Бейнелеу өнері және сызу» мамандығы бойынша педагогика ғылымдарының магистрі дәрежесін алды. Еңбек жолын 2003 жылы бастап, осы уақытқа дейін Х.Досмұхамедов атындағы Атырау университетінің «Бейнелеу өнері және дизайн» кафедрасында аға оқытушы, қазіргі таңда сеньор-лектор ретінде қызмет атқарып келеді. Көпжылдық педагогикалық тәжірибесі барысында көркем білім беру, инженерлік сызба, көлеңке теориясы және перспектива пәндерін оқытуда заманауи әдістерді енгізіп, білім беру сапасын арттыруға үлес қосып келеді. Кәсіби біліктілігін тұрақты түрде жетілдіріп отырады. Әр жылдары Adobe Photoshop және SketchUp графикалық бағдарламалары бойынша курстардан өтіп, «Назарбаев Зияткерлік мектептері» педагогикалық шеберлік орталығы ұйымдастырған тиімді оқыту әдістері бойынша семинарларға қатысқан. Сонымен қатар жоғары оқу орындары оқытушыларына арналған «Қолданбалы зерттеулер жүргізу әдіснамасы» бағдарламасы бойынша білімін жетілдірді. Түркия Республикасының Ақдениз университетінде өткен халықаралық «Тоқыма дизайны және өнері» семинарына қатысып, кәсіби тәжірибесін халықаралық деңгейде толықтырды. Сондай-ақ инклюзивті білім беру және кәсіби қызмет сапасын арттыру бағытындағы курстардан өтті. Ғылыми-әдістемелік қызметінде инженерлік сызба, көлеңке теориясы және перспектива пәндерін оқытудың заманауи әдістерін әзірлеумен айналысады. Сонымен қатар педагогтарға арналған электронды цифрлық білім беру ресурстарын әзірлеу және ақпараттық технологияларды білім беру үдерісіне енгізу бағытында жұмыс жүргізеді. Еркебұлан Жұмаденұлы студенттердің ғылыми жобаларына жетекшілік жасап, мектеп оқушыларына ғылыми жетекшілік көрсету арқылы олардың шығармашылық және зерттеушілік қабілеттерін дамытуға үлес қосады. Ғылыми жарияланымдары халықаралық ғылыми-тәжірибелік конференциялар материалдарында жарық көрген. Оның зерттеулері диалогтік оқыту арқылы студенттердің танымдық дамуын арттыру, бейнелеу өнері негізінде дизайнерлік іс-әрекетке даярлау, болашақ мамандардың кәсіби шеберлігін қалыптастыру және көркем білім берудегі инновациялық тәсілдер мәселелерін қамтиды. Кәсіби қызметі үшін бірқатар марапаттарға ие. 2022 және 2023 жылдары Л.Н. Гумилев атындағы Еуразия ұлттық университетінің Алғыс хаттарымен марапатталған.