Б.Б.Городовиков атындағы Қалмақ мемлекеттік университетінің ұжымы Каспий теңізінде өткен оқу-жаттығу кезінде әскери борышын атқару барысында қаза тапқан әскери қызметшілердің қайғылы қазасына байланысты көңіл айтты.
Университет атынан жолданған көңіл айту хатында бұл ауыр қаза марқұмдардың отбасылары, қаруластары мен бүкіл ел үшін орны толмас қайғы екені атап өтілген.
«Осы қасіретті оқиғаның қайғысы мен ауыртпалығын сіздермен бірге бөлісеміз. Қаза тапқан әскери қызметшілердің ата-аналарына, туған-туыстары мен жақындарына шынайы қолдауымыз бен көңіл айтуымызды білдіреміз. Осындай қаралы сәтте біз сіздермен және әскери анты мен борышына адал болып, өмірін қиған азаматтардың отбасыларымен біргеміз. Қаза тапқан әскери қызметшілердің жарқын бейнесі жүрегімізде мәңгі сақталады», – делінген хатта.
Көңіл айту хатына Б.Б. Городовиков атындағы Қалмақ мемлекеттік университеті Халықаралық қызмет басқармасының басшысы Ансельм Хундайи қол қойған.
