Х.Досмұхамедов атындағы Атырау университетінің «Бейнелеу өнері және дизайн» кафедрасы 1994 жылы Музыка факультетінің жанынан құрылды. Алғашқы кезеңде «Бейнелеу өнері және сызу» мамандығына студенттер қабылданып, кафедраның негізін кәсіби мамандар С.Е.Биғалиев, Б.Ж.Байзулова және Д.А.Төлеуов қалады.

            1995 жылы кафедра Музыкалық білім беру факультетінің құрамына енгізіліп, «Музыкалық білім беру әдістемесі және бейнелеу өнері» атауына ие болды. Бұл кезеңде кафедраны п.ғ.к., доцент В.В.Чуреев, кейін О.Ф.Райсов басқарды. Оқу топтарының көбеюіне байланысты кафедра құрамы кәсіби кадрлармен толықтырылып, кескіндеме, сызу, сәндік-қолданбалы өнер және теориялық пәндер бойынша мамандар тартылды.

            1998 жылы кафедра алғашқы түлектерін шығарып, жеке кәсіби құрылым ретінде қайта жасақталды. 1999 жылы заман талабына сай «Дизайн» мамандығы ашылып, кафедраның ғылыми-педагогикалық әлеуеті айтарлықтай артты.

            Кафедраның дамуы әр кезеңдегі жетекшілердің кәсіби қызметімен тығыз байланысты. Әр жылдары кафедраны О.Қ.Кендір, Е.С.Қоянғалиев, Б.Д.Қалимұқашева, С.Қ.Нұрмұқашева, Н.Ә.Бермағамбетов, С.Р.Кыдырова, Ғ.М.Әлжанов басқарды. Қазіргі таңда кафедра меңгерушісі — магистр, аға оқытушы А.С.Бекешева.

            Кафедрада «Дизайн» және «Бейнелеу өнері және сызу» білім беру бағдарламалары бойынша мамандар даярланып, олар республикалық және халықаралық аккредитациядан өтті. Білім беру үдерісі Болон жүйесінің талаптарына сәйкес жаңартылып, еңбек нарығымен байланыс күшейтілді.

            Бүгінде кафедра жоғары шығармашылық әлеуетімен ерекшеленеді. Оқытушылар құрамында педагогика ғылымдарының кандидаты, ҚР Мәдениет қайраткерлері, ҚР Суретшілер және Дизайнерлер одағының мүшелері қызмет атқарады.

            Кафедра оқытушылары мен студенттері облыстық, республикалық және халықаралық көрмелерге тұрақты қатысып, жүлделі орындарға ие болуда. Атап айтқанда, О.Қ.Кендір республикалық симпозиумда Гран-при иеленсе, Э.М.Жұмабаева халықаралық «Шабыт» фестивалінің Гран-при жүлдегері атанды.

            Кафедра түлектері арасында халықаралық деңгейде танылған суретшілер мен дизайнерлер қалыптасты. Олардың қатарында Рафаэль Слекенов, Ерболат Түсіпов, Ерболат Гизатов және басқа да шығармашылық тұлғалар бар.

            Студенттер ғылыми-шығармашылық конкурстар мен көрмелерде жоғары нәтижелер көрсетіп, халықаралық академиялық ұтқырлық бағдарламалары арқылы Түркия, Финляндия, Латвия және басқа елдерде білім алуда.

            Соңғы жылдары кафедра халықаралық ынтымақтастықты белсенді дамытып келеді. Түркияның Ақдениз, Улудаг университеттері, Қырғызстанның Манас университеті базасында ғылыми тағылымдамалар ұйымдастырылып, шетелдік ғалымдар шақырылды.

            2020 жылы халықаралық онлайн көрме өткізіліп, оған Еуропа мен Азия елдерінен 200-ден астам суретші қатысты. Бұл кафедраның халықаралық деңгейдегі беделін арттырды.

            Қазіргі таңда кафедра инновациялық білім беру мен ғылыми-зерттеу жұмыстарын үйлестіре отырып, бейнелеу өнері мен дизайн саласында бәсекеге қабілетті мамандар даярлауды жалғастыруда.