Х. Досмұхамедұлы атындағы Атырау университетінде Huawei компаниясының өкілдері студенттермен кездесті. Бұл шара Қазақстанның жоғары оқу орындарында Huawei ICT Competition Roadshow 2026–2027 халықаралық байқауын таныстыруға арналған кездесулердің алғашқысы болды.
Кездесу барысында компания өкілдері Huawei ICT Competition халықаралық байқауының негізгі бағыттары, кезеңдері мен қатысу мүмкіндіктері туралы кеңінен мәлімет берді. Сонымен қатар студенттерге байқаудың кәсіби дамуға, жаңа білім мен тәжірибе жинақтауға және болашақта IT саласында мансап құруға тигізетін пайдасы түсіндірілді.
Атап айтқанда, байқауға қатысу студенттерге заманауи ақпараттық технологиялар саласындағы тәжірибелік дағдыларын жетілдіруге, халықаралық деңгейдегі сертификат алуға және өз қабілеттерін саланың жетекші сарапшыларына танытуға мүмкіндік береді.
Кездесу студенттерге халықаралық байқаудың мүмкіндіктерімен жақынырақ танысып, кәсіби дамудың жаңа бағыттары туралы ақпарат алуға жол ашты.
Университет ұжымы Huawei компаниясының өкілдеріне мазмұнды кездесу үшін алғыс білдіріп, студенттерге алдағы байқау кезеңдерінде сәттілік пен жоғары жетістіктер тіледі.
